Matthew 19

1Shi Yesu ɓo ku aɓeda ye zo da, wa fa Galili, wa pi Urdun ya wa jeze lo Yahudiya. 2Azayezhi mwa ɓa vi wo, wa ka ɓa anyasan-yi gna.

3A Farisiyi ho ɓa ɓe ɓa mwi wo, n nabai wa daɓo nko ɓa zhin ɓa wan wo. Ɓa nya ge, “Ho ga gbe ge a gna nyiko ami?”

4Wa gna ɓa ge, “Fye ta ba Shekwoyi ɓeda n? Dna Shekwoyi ɓeda a ka fi ge, Shekwoyi ɓo zhin zanugbai n nyikwozayi nu n kmisunyi. 5– 6Ntu cenu, Zanugbai ɓa fa wo dada n wo ʼya yi wa nyima wo nyikwo nyalo-nyalo. Oɓa aba ɓa ku ze gmanyi-aza gun aba nu ton, ama eza gmanyi! Nya Shekwoyi la kwo yeɓedo, eza ta gna kwa jeya m.”

7Ɓa nya ge, “Kninya zhin Musa wa gna eza ɓa mi wa gna wo nyikwo ami n wasika amignanya yi a?”

8Yesu wa gna ɓa, “Musa ɓo da lonu ntu fya bugba nukwoyi na bugba gnanakwoi ɓo nu, ama Shekwoyi ɓeye nu to ɓo nun, n kmisunyi m. 9Ma gna fye, zaho-zahoi wa ya wo nyikwo, ndei anushin ɓo nu ton, wa la do, wo ku anagbai zhin.”

10Yesu abaraɓa gna wo ge, “Ngye kwo wulo lonu, ha gye kwo gna bmiya lo to za pa mulan!” 11Yesu wa gna, “To vinya nu nɓa ɓa mi ɓa zhin lo nu m, sai dai aza n Shekwoyi wa bma ɓa zhin. 12Azaho lo na ma ɓa n zhin akala-gbai, azaho kuwa, aza nu ze ɓa akala-gbai, azaho ta ye mula pa ɓon, ntu Shekwoyi be-mi ɓo. Fa za wo ɓa mi, wa gwo Mi ɓeda.”

13Aɓe na ɓi nai n Yesu aba ntu ge wa kpe ɓa bwa wa zhin aduwa. Ama owa bara gyi minagyi, ɓa gnakni ɓa ge ɓa gna wo gna-gna.

14Yesu wa gna, “Fye fa aɓi naiye ɓa ɓe Ma ba, fye to nya ɓa ya m. Adeye pya, ɓa zhin Shekwoyi be-mi nya nu.” 15Wa kpe ɓa bwa, Wa tu ɓa anabarka ɓa lo ɓa nya.

Nyabwayi Wa Ma-Wyeya Wa Lo Wo Nya

16Zaho wa ɓe wa nya Yesu ɓo ge, “Dagayi Manayi, kni emanayi nu mi ɓa zhin ma bwa wye-wyei nyalo-nyalo nya?”

17Wa nya ge, “Manayi? Eza bwa sun lo gmanyi nu n Wo zhin manayi gaiciya nya (Wo nu zhin Shekwoyi.) Ama gbedna miɓa dna ho, ho ɓa mi ha lo she ndei ha shi awyidna bwa.”

18Wa nya ge, “Akni deya?” Yesu wa gna wo ge, “To wu za m, to ha zhin anagbayi m, to ha wyi vi m, to ha ce akata m, 19Ga ho dada mwa-mwa n ho ʼya yi, ha ye ho kun-zhi yi ngye shi ho ye hohin tukwo!”

20Wa gna, “Mi zhan ɓeye lo vinya. Knihin nu miyi ce ma zhiʼa?”

21Yesu wa gna wo, “Ndei ho ye ha ze za nu-nuyi, lo ho ku anya kun vinya n ho cei, ha ku agyiwye ga a san-yi, ho ɓa bwa duciya n she, ha ɓe ha vi mi.” 22Ama she ɓiniyi ye ɓo wo lonu, wa laka bugba wun yi, ntu ge wo ɓo zhin duciya da nu mwa.

23Yesu wa gna wa bara, “Gaiciya, kwo dnaɓo lo duciya da wa lo Shekwoyi ʼbe-mi. 24Ma je fye gna, kwo du lo n sauci lakunmi kwa du naci bwo da duciya da wo lo Shekwoyi ʼbe-mi!”

25Ɓedahi kwa wo abara ɓa gna, “Nyikanu ɓa shan pwo nanyi ye nɓa shi nyi ʼa?”

26Yesu wa shi ɓa wye zun wa gna, “N zanyi-kwoci wyegye, zaho to lo m! Ama n Shekwoyi yi, aɓo vinya ɓa ye zhin.”

27Bitrus wa gna Wo ge, “Yi ku anya vinya fa ntu ge ya vi Ho. Yi ɓa bwa kninyi dna nkwo miʼa?”

28Yesu wa gna, “Gaiciya, esa Mi, Eza Nugun, ɓei sase tu Mi shinkpegye latu nya n Shekwoyi Bemi, fyehin, Oma bara ɓei sase kpe na shin-kpegye awo cei-aba fyei da Israilayi abye awo-cei-aba owa.

29“Zaho-zahoi n wo la wa pyi fa, nwa zaje yi, n wa mapui, n dada yi, n ʼya yi, nnyikwo yi, naɓi yi, kwo duciya, ntu ge wa vi mi, wo ɓa bwa gyiba har abwa tagyi ngye shi wa fa anya sun, njesun wo ɓa bwa wye-wyei nyalo-nyalo nya. 30Ama n mwa begye nɓa zhin akmisunyi saiye, ɓa ɓei ze a kmaknayi, akmaknayi ho n saiye ce ɓei ze a kmisunyi.”